The Lashawan Qadash

לְדָוִ֨ד שָׁפְטֵ֤נִי יְהוָ֗ה כִּֽיאֲ֭נִי בְּתֻמִּ֣י הָלַ֑כְתִּי וּבַיהוָ֥ה בָּ֝טַ֗חְתִּי לֹ֣א אֶמְעָֽד

בְּחָנֵ֣נִי יְהוָ֣ה וְנַסֵּ֑נִי צָרְפָ֖ה כִלְיֹותַ֣י וְלִבִּֽי

כִּֽיחַ֭סְדְּךָ לְנֶ֣גֶד עֵינָ֑י וְ֝הִתְהַלַּ֗כְתִּי בַּאֲמִתֶּֽךָ

לֹא יָ֭שַׁבְתִּי עִם מְתֵי שָׁ֑וְא וְעִ֥ם נַ֝עֲלָמִ֗ים לֹ֣א אָבֹֽוא

שָׂ֭נֵאתִי קְהַ֣ל מְרֵעִ֑ים וְעִם רְ֝שָׁעִ֗ים לֹ֣א אֵשֵֽׁב

אֶרְחַ֣ץ בְּנִקָּיֹ֣ון כַּפָּ֑י וַאֲסֹבְבָ֖ה אֶת מִזְבַּחֲךָ֣ יְהוָֽה

לַ֭שְׁמִעַ בְּקֹ֣ול תֹּודָ֑ה וּ֝לְסַפֵּ֗ר כָּל נִפְלְאֹותֶֽיךָ

יְֽהוָ֗ה אָ֭הַבְתִּי מְעֹ֣ון בֵּיתֶ֑ךָ וּ֝מְקֹ֗ום מִשְׁכַּ֥ן כְּבֹודֶֽךָ

אַל תֶּאֱסֹ֣ף עִם חַטָּאִ֣ים נַפְשִׁ֑י וְעִם אַנְשֵׁ֖י דָמִ֣ים חַיָּֽי

אֲשֶׁרבִּידֵיהֶ֥ם זִמָּ֑ה וִֽ֝ימִינָ֗ם מָ֣לְאָה שֹּֽׁחַד

וַ֭אֲנִי בְּתֻמִּ֥י אֵלֵ֗ךְ פְּדֵ֣נִי וְחָנֵּֽנִי

רַ֭גְלִי עָֽמְדָ֣ה בְמִישֹׁ֑ור בְּ֝מַקְהֵלִ֗ים אֲבָרֵ֥ךְ יְהוָֽה